Lafz.e Haider yeh bataata hai ke hai dar baaqi (ek musaddas)

ai basher dard ki aaGhosh meN palta kyuuN hai
mushkileN aag haiN too aag meN jalta kyuuN hai
ik madadgaar ka saya tujhe khalta kyuuN hai
nasamajh saye meN aa dhoop meN chalta kyuuN hai

Tishnalub hai tire pahloo meN samander baaqi
lafz.e Haider yeh batata hai keh hai dar baaqi

Woh harik mushkil.e dushwar ko suljhate haiN
Raah bhaTke huwee rahgeer ko dikhlate haiN
Hum haiN kya cheez woh NabiyoN ke bhi kaam aate haiN
Unki tAAreef meN Sarkaar yeh farmate haiN

ai Ali tum se hai islaam ka lashkar baaqi
lafz.e Haider yeh batata hai keh hai dar baaqi

Tum ne jaana tha keh be moonis.o.beyaar hooN maiN
Mushkilo! tum ne yeh samjha tha ke laachaar hooN maiN
“Haidri” naam hai Maula ka parastaar hooN maiN
Y’aani darwesh.e dar.e Haider.e Karraar hooN maiN

mujhe tanha nah samajhna keh hai yaaver baaqi
lafz.e Haider yeh batata hai keh hai dar baaqi

Dar se haider ke malak roTiyaaN le aaya hai
Shaah ke dar se farishte ne sharaf paaya hai
Apne e’zaaz-e gadaaii peh woh itraaya hai
raasta bheek ka hum jaisoN ko dikhlaaya hai

they yehee lafz farishtey ki zubaaN per baaqi
lafz.e Haider yeh batata hai keh hai dar baaqi

nam le unka tou har dil ko shujaaAt mil jaaye
shaah bun jaaye gadaa taKht.o.Hukoomat mil jaaye
ho karam unka tou muZtar ko bhi raahat mil jaaye
woh jise apna banaa leN oose jannat mil jaaye

dil.e maayuus men ho aas nah kuyyNkar baaqi
lafz.e Haider yeh batata hai keh hai dar baaqi

Haider ke aashiqoN ka gulistaan hai Ghadeer…..

kisne kaha keh dasht.e biyaabaan hai Ghadeer
Haider ke aashiqoN ka gulistaan hai Ghadeer

hai kaun Murtaza ka moHib kaun hai Adoo
such poochiye tou donoN ki pahchaan hai Ghadeer

hai kisko paas Hukm.e Khudaa.o.Rasool ka
tola hai huq ne jismeN woh meezaan hai Ghadeer

tableeGh Mustafa ki mukammal huuwee jahaN
QurAAn hai gawaah woh maidan hai Ghadeer

Haider ke jaaN NiSaaron ki wajH.e sukoon.e qalb
aur HasidoN ke runj ka saamaan hai Ghadeer

ai mukir.e fazaaiil.e Haider yeh jaan ley
Maula ke martabe ka nigahbaan hai Ghadeer

dilmeN khalish zubaaN peh “mubarak ho ya Ali”
aise munafiqoN se pareeshaan hai Ghadeer

“Jawaid” lo Rasool ka mimber bhee bun gaya
kahne ko ek Khitta.e veeraan hai Ghadeer

………………………………………………..

jhukaaye sir kabhee maidaan se aate nahiN Haider

sadaa.e bekas.o. majboor Thukraate nahiN Haider
kabhee taaKheer bhee aane meN farmate nahiN Haider

kisee mushkil meN oos mushkilkushaa ko aazmaao tou
pukaara hi nahiN aur kah diya aate nahiN Haider

koii Hal kar rahaa hai mushkileN maHsoos hota hai
yeh nazroN ki hai kotaahee nazar aate nahiN Haider

Ali karte hoN jis se juNg samjho duhman.e deeN hai
Keh zaatee dushmanoN se juNg farmaate nahiN Haider

palaTtey haiN tou sir kaafir ka apne haath meN le kar
jhukaaye sir kabhee maidaan se aate nahiN Haider

nigaahe lutf yaksaan hai farishtey hoN keh insaaN hoN
kisee saaiil ko Khaalee haath lauTate nahiN Haider

bataur.e azr ai “Jawaid” jannat mang ley unse
kisee maddaaH ki faryaad Thukraate nahiN Haider

…………………………………………………

maiN jaanta hooN mujh se Ali beKhabar nahiN…..

har samt mushkileN haiN magar mujh ko Dar nahiN
maiN jaanta hooN mujh se Ali beKhabar nahiN

deevaar se makaN meN sabhee ka guzar nahiN
yeh KhaaS raasta hai koii Aam dar nahiN

momin ki jaaidaad villaa.e Abu Tarab
iss maal.ozar se baRhke koii maal.o.zar nahiN

paiGhaam de raha hai hameN Khutbaa.e Ghadeer
bAAd.e Nabee Ali sa koii mo’tabar nahiN

Haider maHaaz.e juNg se aaye haiN fatHyaab
dushman ka hai yeh Haal keh ab tan pe sar nahiN

woh bistar.e Rasool pe soya tamaam raat
jo zindagee meN soya kabhi raat bhar nahiN

mushtaaq.e deed.e roza hooN “Jawaid” kya karooN
perwaaz ki talab hai magar baal.o. per nahiN

…………………………………………………..

kaaGhaz maHaaz.e juNg qalam zulfeqaar hai ……..

mehfil sajaaiye keh yeh jashn.e bahaar hai
madH.e shah.e Najaf ko jahaN beqaraar hai

dekho Ghulaam.e Haider.e Karraar ka jihaad
kaaGhaz maHaaz.e juNg qalam zulfeqaar hai

beshuk Adoo Ali ka Adoo.e Rasool.e Paak
dushman Nabee ka dushman.e parwardigaar hai

Taaqat pe tujhko naaz hai MarHab magar na bhool
har dushman.e Ali ke muqaddar meN haar hai

ho jaada.e Hayaat meN kyuuN fikr.e pesh.o.Kham
jab raahbar mira shah.e duldul sawaar hai

Toofaan.e bahr.e gham meN ghiraa hai harik bashar
jo Ya Ali kahe woh samander ke paar hai

“Jawaid” martaba yeh bafaiz.e qalam mila
Maula ke shairoN men hamara shumar ahi.

………………………………………………….