har sher qaseedey ka gul.e tar ki tarah hai

waise to shabahat meN Pyamber ki tarah hai

maqtal meN pisar shaah ka “Haider” ki tarah hai

yaksaaN nazar aate hai shujaAt meN bahattar

ik Tifl bhee Abbas.e dilaawar ki tarah hai

such poochho tou lashker meN harik fard hai lashkar

har mauj yahaN ek samander ki tarah hai

Khud nahr bhee hai qabza.e “Abbas” peh HairaaN

yeh kaun jaree faatH.e Khaiber ki tarah hai

aisa bhi koii hoga muqaddar ka sikander

Shaih kahte thEy Hur mere birather ki tarah hai

besheer pe karta hai layeeN teer se Humlah

yeh kaisa ajab dil hai jo paththar ki tarah hai

kya jaane mahak jayegee “Jawaid” kahaN tak

har sher qaseedey ka gul.e tar kitarah hai

————————————

yeh dhuwaan jung ka anjam bhee aaGhaaz bhee hai

dil ki awaaz bhee hai zahn ki parwaaz bhee hai

“Hur”! yeh hijrat tira anjam bhee aaGhaaz bhee hai

laash.e “Abbas” pe ro ro ke wafaaoN ne kahaa

tire marne pe hameN runj bhee hai naaz bhee hai

rah ke aaGhosh.e pidar meN usey karna hai jihaad

Tifl.e besheer jo kumsin bhee hai jaaNbaaz bhee hai

iss liye kahte haiN “Akbar” ko shabeeh.e Mursal

shakl.o.Surat bhee wohee hai wohee andaaz bhee hai

hai yeh qurbaani.e “Shabbeer” ka faizaan.e azeeem

aaj masjid bhi hai takbeer ki aawaaz bhee hai

jalte KhemoN pe Adoo Khush hai usey kya mAlum

yeh dhuwaaN jung ka anjam bhee aaGhaaz bhee hai

log “Jawaid” tujhe kahte haiNmaddaaH.e Imam

yeh tire fun ke sanad bhee tira e’zaaz bhee hai

————————————-

farzaNd bhee maanid.e pidar hai keh nahiN hai

roomaal meN sarmaya.e zar hai eh nahiN hai

har ashk mira rashk.e guhar hai keh nahiN hai

neze ki bulandee peh woh sar hai keh nahiN hai

mazloom baharHaal zabar hai keh nahiN hai

Main rahguzar.e madH.e Shaih.e deeN ka musaafir

jannat ki taraf mera safar hai keh nahiN hai

“AsGhar” ke tabassum ne kaha fauj.e sitam se

farzaNd bhee maanid.e pidar hai keh nahiN hai

“Shabbeer” ne seencha tha jo baGh apne lahu se

aaj uske daraKhtoN pe Samar hai keh nahiN hai

hum ahl.e azaa ghar ko banaa lete haiN jannat

ab fikr kise Khuld meN ghar hai keh nahiN hai

“Jawaid” sa na ahl kare madH.e Shaih.e deeN

Yeh mojza.e fikr.o.nazar hai keh nahiN hai

————————————

dar.e “Husin” se Islam ko Hayaat milee

 

galaa kaTaake mujhe daaimee hayaat milee

huuwa tabaah sitamgar usey mamaat milee

 

hameN bafaiz.e azaa saaree kaainaat milee

yeh gham mila tou harik runj se nijaat milee

 

suna tha subH ke bhooley ka sham ko aana

misaal dhooNdh rahe thEy keh “Hur” ki zaat milee

 

mila wojood “Nabee.e Kareem” ke dar se

dar.e “Husin” se Islam ko Hayaat milee

 

hai kis balaa ki Khuda jaane tishnigee meN kashish

harek qaum hameN tishna lub ke saath milee

 

kiya tou aaNkhoN ne deedaa.r rauza.e Sarwar

magar yeh deed bafaiz.e taSawwooraat milee

 

bhaTakne waale bus ik baar karbala aa ja

harek dil ko yaheeN se rah.e Sabaat milee

 

bujha sakee nah bahattar ki pyaas ai :Jawaid:

nidaamatoN se bohat tar hameN Furaat milee

————————————-

mira qaatil hai kahiN buch ke nah jaaye “Zainab”

 

lub pe naam “Aun.o.Mohammed” ka na laaye “Zainab”

hai yeh “Zainab” se taqaazaa.e wafaa.e “Zainab”

 

ruKh se zalim ke bahan tujhko uThaanee hai naqaab

mira qaatil hai kahiN buch ke nah jaaye “Zainab”

 

Shaah kahte they keh hai sabr hamaara paiGham

Shikwa.e zulm kabhee lub pe nah aaye “Zainab”

 

Bhaii “Abbas” ke humsar nazar aayegee bahan

paRhke dekho to kabhee baab.e wafaa.e “Zainab”

 

raawee kahta hai keh Hakim ka larazne laga dil

gooNjee darbar meN jis lamha sadaa.e “Zainab”

 

saaya.e chaader.e tat’heer nahiN chhin saktaa

laakh chheeney koii “Zainab” se ridaa.e “Zainab”

 

deen.e Huq zulm ke sholoN meN ghira hai :Jawaid:

aaj “Sajjad” ko phir Kheme se laaye “Zainab”