mira qaatil hai kahiN buch ke nah jaaye “Zainab”

01 Mar 2007 Leave a Comment

by Jawaid Badayuni in Imam Husain(a.s.) Qasaaiid aur Salaam

 lub pe naam “Aun.o.Mohammed” ka na laaye “Zainab”

hai yeh “Zainab” se taqaazaa.e wafaa.e “Zainab”

 

ruKh se zalim ke bahan tujhko uThaanee hai naqaab

mira qaatil hai kahiN buch ke nah jaaye “Zainab”

 

Shaah kahte they keh hai sabr hamaara paiGham

Shikwa.e zulm kabhee lub pe nah aaye “Zainab”

 

Bhaii “Abbas” ke humsar nazar aayegee bahan

paRhke dekho to kabhee baab.e wafaa.e “Zainab”

 

raawee kahta hai keh Hakim ka larazne laga dil

gooNjee darbar meN jis lamha sadaa.e “Zainab”

 

saaya.e chaader.e tat’heer nahiN chhin saktaa

laakh chheeney koii “Zainab” se ridaa.e “Zainab”

 

deen.e Huq zulm ke sholoN meN ghira hai :Jawaid:

aaj “Sajjad” ko phir Kheme se laaye “Zainab”