mira qaatil hai kahiN buch ke nah jaaye “Zainab”

 

lub pe naam “Aun.o.Mohammed” ka na laaye “Zainab”

hai yeh “Zainab” se taqaazaa.e wafaa.e “Zainab”

 

ruKh se zalim ke bahan tujhko uThaanee hai naqaab

mira qaatil hai kahiN buch ke nah jaaye “Zainab”

 

Shaah kahte they keh hai sabr hamaara paiGham

Shikwa.e zulm kabhee lub pe nah aaye “Zainab”

 

Bhaii “Abbas” ke humsar nazar aayegee bahan

paRhke dekho to kabhee baab.e wafaa.e “Zainab”

 

raawee kahta hai keh Hakim ka larazne laga dil

gooNjee darbar meN jis lamha sadaa.e “Zainab”

 

saaya.e chaader.e tat’heer nahiN chhin saktaa

laakh chheeney koii “Zainab” se ridaa.e “Zainab”

 

deen.e Huq zulm ke sholoN meN ghira hai :Jawaid:

aaj “Sajjad” ko phir Kheme se laaye “Zainab”

Ghazee muqeem.e saaHil.e darya hai aaj tak

 

Ghazee muqeem.e saaHil.e darya hai aaj tak

yAAni usee ka nahr pe qabza hai aaj tak

aaqa kahe jo apne biraather ko saari umr

aaNkhoN ne aisa bhaaii nah dekha hai aj tak

tum ne kiya tha waar jo Ghaazee ki pusht per

daaman pe buzdili ka woh dhabba hai aaj tak

apnoN ka mulk ho ya kisee Ghair ka watan

sikka tiree wafaooN ka chalta hai aaj tak

tareeKh hai gawaah kisee tishna kaam ne

chullu meN leke aab nah pheka hai aaj tak

paani piya nah jis ne woh sairaab ho gaya

such poochiye tou darya hi pyaasa hai aaj tak

maula qubool kijiye jaisa bhi hai kalaam

“Jawaid” funne madH meN kachchaa hai aaj tak