dar.e “Husian” pe faryaad kar ke dekhte haiN

17 Feb 2007 Leave a Comment

by Jawaid Badayuni in Imam Husain(a.s.) Qasaaiid aur Salaam

 

chalo karishme Shaih.e baHr.o.bar ke dekhte haiN

dar.e “Husian” pe faryaad kar ke dekhte haiN

Shaih.e umam ne gadaaoN ko taaj baKhsh diye

tou hum bhi lutf zara unke dar ke dekhte haiN

suna hai unki mowaddat hai rahmatoN ka shajar

tou uske saaye meN hum bhi tahar ke dekhte haiN

suna hai ashk,e azaadaar haiN dur.e naayaab

tou apne ashkoN se daaman ko bhar ke dekhte haiN

suna hai jaadaa.e huq hai “Husain” ka jaada

tou unki raah se hum bhi guzar ke dekhte haiN

Khuda hi jaane woh pahooNcheNge kaise rauze tak

Safar se qabl jo Kham raihguzar ke dekhte haiN

Milee qalam ki zameen.e “Faraz” ai “Jawaid”

Sanaa.e Hazrat.e “Shabbeer” kar ke dekhte haiN

 ——————————————